Härzensprojekt es Chäppli ond es Deckeli förs KSA
Es goht chorz gseid drom das jedes Baby das in Aarau d'Neonatologie verloht, es Chäppeli ond es Deckeli wos am 1. Tag öberchond, darf bi sim Spitalustrett metnäh. Äbefalls wönsch ech mer, dass mer im Mami bi sim Spitalustrett, e Decki wo de Groch vom Baby het, cha methei gäh.
Ech bruchti somet Lüüt wo nähed, lesmet, höggelet ond eus finanziell onterstötzed. Gärn send ou anderi Vorschläg wellkomme. Ganz onderem Motto jede darf gäh was är wott. Chäppli & Deckeli wärdet gröschte Teils us de Spände finanziert oder vo de Handwärkerinne säuber organisiert. Met vöu liebi & Härzbluet wärdet Deckeli us Fleece & Käppli us Baumwolle in absoluter Freiwilliger-Ehrenamtlicher Tätigkeit härgstöut. Bes jetzt (Wiehnachte 2019) hemmer bereits 225 Chäppli ond 42 Deckeli dörfe öbergäh. Äbeso het s'KSA diversi Lagerigskössi-Öberzög, Pumphöseli, Finkli, Schuehli, Söckli, Rägewormsöckli, Händschli ond Pulswärmerli vo eus öbercho.
I de Zwöscheziit hend mer scho meh als 800 Chäppeli und mehreri hondert Deckeli dörfe verschänke..
Mini Beweggrönd dezue send folgendi
Eusi Sofia het noch de Geburt för 3 Woche müesse of de Neonatologie bliebe, do sie i de 34. Schwangerschaftswoche of d'Wält cho esch. Es send zwor nor Täg gsi aber es het sech vöu länger agfühlt. I de Sofia gohts jetzt sehr guet ond sie nehmt täglech zue. Eusi chlii Kämpferi het sech ennert wenige Täg scho super as Irdische Läbe chönne apasse. I dere Spital Ziit han ech sooo vöu stonde of de Neonatologie verbrocht ond 100 stonde met dene "frömde Mönsche" gredt. Sie send mer alli soo as härz gwachse. Mer hend metenand gredt, ghüület vor Angscht ond denn weder ghüület vor Freud. Vor Freud ond grüehrtheit vo de Liebi vo dene Frömde Mönsche wo ime frömde Baby so vöu Liebi wie nor möglech schänked. Alles was die Chendli det dörfed zor Leihe ha, alli Chleidli, Glesmeti Chäppeli, Deckeli usw esch ehne vor johre mou gspändet worde.
Jetzt han ech es Ziel: Mis Ziel esch, das jedes ond ou werkli jedes Chend, wenns us de Neo hei darf, sis Deckeli ond sis Chäppeli darf met hei näh. Äbefalls möcht ech jedem Mami e Decki schänke wenn sie usem Spital entloh werd. So het jedi Mama de Doft vo ehrem Baby bi sech. Das esch mine Härzenswonsch. Da ech aber leider kes Genie im lesme weder no im nähe be, han ech ganz vöu onterstötzig agforderet.
So auso bitte häufed met ond froged alli wo gärn nähet ond lesmet, öb sie mer häufed. Mer Bruuuche ganz vöu Deckeli ond gaanz vöu Chäppeli. Ech möcht mim liebe Maa Markus danke för sini tatkräftig ond liebevolli Onterstötzig. Ond i minere "grosse" Tochter LEONIE wo alles so tapfer metgmacht het ond ou jetzt no verständnisvoll reagiert wenn d'Mama am PC höckled ond a de Websiite schaffet.
För alli wo gärn wettet lesme oder näihe mäldet euch doch bitte bi mer. Mer send ou öber jede Finanzielli Zuestopf froh. Bi Inträsse mäldet euch doch eifach.
Es paar Impressione vo de wonderschöne Sache wo e de Frühchen verschänkt wärde dörfed
Ganz härzleche Dank i allne Spänderinne und Spänder sowie mine fiessige Näherinne und Lesmerinne.
Härzleche Dank ou im Verein vo Härze für Frühchen und Stärnechind, wo mech vo Härze bi mim Härzprojekt onterstötzed...
https://fruehchenkleider.wixsite.com/vonherzen
